敖清雯 | Nat
客戶服務課程

Nat於2018年畢業於Generation X CLAP@JC客戶服務課程,參加課程前,她一直對酒店款接行業深感興趣,早在2014/2015學年便完成了香港專業教育學院的酒店款接基礎文憑課程,卻因沒有信心而止步於申請酒店的前線職位。

透過Generation X CLAP@JC的培訓課程,Nat 逐漸累積足夠的信心,再次嘗試加入酒店款待行業。她說:「Generation X CLAP@JC課程令我可以好自信咁表現我最好嘅一面!我唔再怕去申請酒店嘅前線職位。」

在Generation X CLAP@JC課程的個人成長
她指出課程內容大大幫助她認識自己:「學到最重要嘅一定包括面試同寫 CV 嘅技巧。正式面試前做嘅幾次模擬面試同 CV360 教學絕對幫助僱主更容易睇到我嘅優點、技巧同態度,從而協助佢哋檢視我點樣適合呢份工。透過Generation X CLAP@JC課程入面嘅僱主探訪環節,我唔單止了解到唔同公司嘅空缺,更加深入了解到各個公司嘅文化,由此令我選擇到最適合自己嘅公司。」

在教授實用技巧時,課程亦以有趣互動的摸式授課,Nat有感而發:「角色扮演畀我喺返工之前已經識點樣應對各式各樣嘅客人。例如應對好憤怒嘅客人嘅時候,就算佢喺前台大吵大鬧,都唔駛急、唔駛怕、唔駛直接搵上司,而係可以安排佢去一個角落,等佢稍微冷靜後慢慢用心聆聽,再去理性解決。」

Nat補充,年輕時曾經很任性,工作時「射波」請病假亦時有發生,現在認識到責任二字的重要性:「依家責任心重好多嘅,以前對返工嘅責任冇話有幾重視。但係讀完課程後就發覺前台好咩崗位都好,你遲到一分鐘都係遲,都要其他人幫你執手尾。」課程亦令她明白從他人角度出發,學懂體諒,工作時,甚至能在客人提出要求前,已觀察到其需要,主動幫助客人:「例如當客人凌晨才到達酒店,我哋已經預早準備好一切匙卡及安排運送行李,務求令客人用最短嘅時間辦理入住手續,盡快上房休息。」這些種種,都是Nat愈顯成熟、認真的表現。

知識與經驗助逆境下成功「轉行」
Nat提到課程導師和學員之間的關係就好像朋友:「畢咗業咁耐,大家仲保持良好關係,佢地亦一直關心我嘅職涯發展。」現時的主管—ISS Facility Services Limited的設施經理(客戶服務及大厦營運)Anita 談及與Nat的第一次面試,已從其CV和對答中,感受到Nat的成熟度:「為面試準備充足、對行業有充份理解,同埋說話有條理—佢嘅表現令我印象好深刻」在新崗位上,Nat更運用了她在課程學習的知識,以及在服務業的工作經驗幫助上司管理小組,在逆市中成功「轉行」。