[學員分享] 熱情與學習點燃科技職涯 在科技業找到新舞台

一段成功的職業生涯，到底有沒有一條絕對的方程式？許多人未必有一個肯定的答案，但過程絕對離不開「學習」，亦即是這個年代所重視的成長型心態（Growth Mindset）。Generation Hong Kong首屆舊生會委員Nat Chan跟Victor Yeung分別在初級數據工程師以及前端網頁開發員課程畢業了超過一年的時間，現在分別於數碼科技顧問公司為客人提供數據工程解決方案；及於本地飲食集團擔任雲端及網站開發的工作。從短短兩小時的飯聚訪談，二人興奮雀躍地講述著自己最近在工作上的近況、最新發掘的新AI工具，以及接下來準備考哪張網上證書，從他們兩位的對談中，不難感受到「心態決定境界」這個道理。

對行業的熱愛可能是一時衝動 但學習的熱誠才能讓自己走得更遠

讀書時期誤打誤撞之下進入了餐飲行業，擁有十年餐廚經驗的Nat：「Fine Dining呢行嘅工作節奏好快，有時候要係同一時間兼顧好幾樣野，根本無時間思考生活，一日做十二個鐘。」供應鏈管理工商管理學科出身的Victor坦言自己初期職涯路上沒有方向，亦很容易被身邊友好影響：「嗰時無咩想做嘅工！朋友話嗰樣好就聽佢做嗰樣，做過客服，金融，銀行前台等等，直至到佢鼓勵我接觸IT行業，我先打破對呢行嘅刻板印象！」

縱然二人初期的職涯路大不相同，但他們當時皆對自己未來的路感到困擾，甚至覺得自己職涯出現了瓶頸。Nat續指：「自己做過大大小小嘅餐飲集團，甚至去到一個位我望住一份新食譜都有信心可以完成，但係正因為呢行嘅工作模式，每日重複，我預見到未來五年、十年都係咁，就覺得係時候要去試啲新嘢，一樣可以持續有新嘢學嘅工作。」當時的她並沒有確切的轉行方向，恰巧在瀏覽社交媒體時，留意到當年美國大選原來與「大數據」有一定關係，從而閃過了解數據行業的想法。不過平日工餘時間不多，只能從社交媒體上接觸到簡單的數據分析概念。剛好地，Victor都有相似處景而萌生轉行想法，當時的他因工作生活過於公式化而感到厭倦：「當我摸索到點樣去追業績，所有嘢喺眼中好似都變到好重複，習慣咗之後根本搵唔到令自己起勁嘅動力，甚至當我停低回想自己『跑數Mode』仿佛扮演緊另一個陌生嘅自己，當我諗通咗就萌生想改變嘅心態。」

 

看不見的未來才有希望 看得見的未來才可怕

也許二人有著破釜沉舟的轉行勇氣，但原來他們對於毫無相關背景下進入科技行業的信心仍然不足。被問到為何要轉科技行業而非其他行業，他們透露除了被未來行業前景吸引外，更重要的是日新月異急速發展的行業本質，使他們能推動自己持續學習，繼續擁抱不確定性。Nat道：「呢一行係日日都變緊，今日學識嘅技能聽日可能就已經唔合適，我可以繼續用現有經驗繼續整好多年甜品，但喺科技行業你一停止進步學習就會被淘汰，行業嘅本質就已經鼓勵到自己繼續進步。」

二人抱著「摸石過河」的心態直至報讀了Generation的課程，不過對於已經多年沒有接觸全日制上課模式的他們來說，突然由辦公室轉換到課室模式的節奏，確實有一定程度吃力。「當時自己算爬升到一定嘅職級，要放棄一切，轉行從零開始其實有好大包袱，不過屋企人就十分支持，佢哋總係覺得整甜品嘅出路有限。」Nat表示。

 

視挫折為動力 化困難為機會

Generation的Bootcamp課程結合了行業知識、實戰項目及軟技能訓練，讓打算入行學員學懂行業技能，應對職場的挑戰。課程期間亦有導師、行業的嘉賓分享業界實況，並提供履歷指導和模擬面試。最重要的是課程建立了一個「可以改變」的信念——Nat 和 Victor 用三個月時間換來全新的舞台，證明只要積極自我提升，未來就有無限可能。過程雖然辛苦，但努力付出總會有意想不到的收穫。問及二人課程期間的經歷，他們和許多畢業學員一樣，對於從零到學懂的學習過程感到相當有挑戰，尤其科技行業更講求邏輯與解難能力，他們形容過程猶如找到一部「啱玩嘅遊戲」：「我諗令我哋着迷嘅原因係，呢個學習過程好似打機咁，一關過完又一關，過程總會遇到一啲未識解決嘅問題，好似人哋上網睇攻略咁，我哋會問AI自學，當中拎到好多滿足感。」面對三個月密集式課程，縱然如他們所指過程當中或許會經常遇到不懂解決的課題，如從零開始學習程式邏輯、基礎語法等課題時必然會遇到挫折，但二人正面的心態以及轉行的決心讓這些困境一一消弭：「Bootcamp嘅節奏好緊湊，正正因為咁先可以推動自己繼續向前！」Victor強調自己並非本科出身，但學歷並非唯一衡量一個人工作能力的指標，反而保持對自己的信心更為重要：「科技行業吸引我嘅地方，就係嗰份解決難題後嘅成就感！我初初入行時接咗個Project，團隊裡有超過十年經驗嘅同事都諗唔到方案，最終俾我用咗幾晚成功拆解到！幾威㗎！」話猶未了Nat馬上點頭回應：「無錯！自此之後我就好期待公司接一啲有挑戰性嘅Project，哈哈！」。

 

「自己都掙扎過，身邊有人鼓勵，條路會易行好多」

兩位現時皆為Generation Hong Kong首屆舊生會委員，過去曾分別籌備及參與舊生聯誼活動、舊生同行計劃、職涯分享等。舊生會成立的目的，是希望延續學員的身份，更有效地支援學員畢業後的職涯發展。當提及成為舊生會委員的原因時，Nat先道：「我純粹想用過來人嘅身份，試吓影響身邊嘅人！」在成為舊生會委員之前，Nat從來沒有在公開場合分享過自己的轉職經歷，單純抱着試一試的心態：「自己都同其他人一樣掙扎過，幸好身邊有人鼓勵，條路可以易行好多。」Victor同樣相信自己的故事能夠為身邊處於迷惘階段的學員注入一支強心針：「我喺舊生會期間參與過叫『Tech Buddies』嘅programme，同其他啱啱入行嘅舊生交流，我唔敢講自己係佢哋Mentor，似係『雞湯Buddies』多啲，好享受大家互相交流嘅過程，係一個我好鍾意的Peer Support概念！」

二人最初單純只是本著回饋Generation Hong Kong的心態加入舊生會，最後卻發現過程同樣能夠為自己帶來得着。「自己讀緊課程嘅期間受惠於好多唔同資源，所以本身係想幫返其他Struggle緊嘅人，原來當你有機會去了解其他人嘅故事，發現其實大家都喺唔同嘅階段努力緊，呢啲故事同時都鼓勵到我繼續努力！」Victor表示。Nat亦相當認同「互相交流」的精髓：「我以前做甜品，有好多嘢需要互相交流碰撞先會有進步，如果我踏出主動分享呢一步，對方會感受到，或者有得着，何樂而不為呢！」

Nat 和 Victor 的經歷提醒我們，職涯並沒有唯一的公式。科技只是其中一條路，但改變職涯的第一步，就是當你願意擁抱學習、接受挑戰，未知的未來便會成為你最大的希望。

發布日期：10 Dec 2025